Si ta nisni ditën pa stres, këshilla të mëngjesit për ta nisur ditën mbarë në çerdhe!

Për shumë prindër, momenti i mëngjesit para çerdhes është një nga sfidat e përditshme. Jo sepse nuk duan të shkojnë, por sepse për fëmijët, ndarja nga prindi për disa orë është një përvojë emocionale e madhe. Disa fëmijë reagojnë me gëzim, të tjerë me lot, dhe disa thjesht shfaqin një ngurrim të qetë.

Ajo çfarë ndodh në 30–45 minutat e para të ditës, shpesh përcakton se si do të rrjedhë e gjithë dita e fëmijës në çerdhe. Një rutinë e butë dhe e parashikueshme jo vetëm që e lehtëson këtë moment, por ndihmon edhe edukatoren të fillojë ditën me një fëmijë më të qetë dhe më të hapur për të bashkëpunuar.

1. Krijoni një rutinë të qëndrueshme – sekreti i sigurisë

Fëmijët ndihen më të sigurt kur dinë çfarë i pret. Një rutinë e njëjtë çdo mëngjes krijon ndjenjën e parashikueshmërisë, duke ulur ankthin.
Shembull praktik:

• Zgjimi në të njëjtën orë çdo ditë

• Një përqafim i gjatë ose një “mirëmëngjes” me këngë

• Mëngjesi gjithmonë në të njëjtin vend (tryezë, kuzhinë)

• Veshja pas mëngjesit, jo para, që të shmanget rrëmuja nga njollat e ushqimit

2. Jepini kohë për një zgjim të ngrohtë

Kur fëmijët zgjohen me nguti, trupi dhe mendja e tyre nuk kanë kohë të përshtaten. Një moment i qetë para fillimit të përgatitjeve mund të ndryshojë krejt atmosferën.
Shembull praktik:

• Një “koha e përqafimit” 2–3 minuta para se të ngriheni nga shtrati

• Një këngë e njëjtë që e këndoni çdo ditë

• Një lojë e vogël: “Le të gjejmë diellin”, hapni perdet së bashku dhe shikoni jashtë

3. Përfshijeni fëmijën në vendime të vogla

Kur fëmija ka të drejtë zgjedhjeje (edhe në gjëra të thjeshta), ndjenja e kontrollit rritet dhe rezistenca bie.

Shembull praktik:

• “Dëshiron të veshësh bluzën blu apo të kuqe sot?”

Flisni me dashuri për çerdhen

Fëmijët e ndjejnë energjinë e prindërve. Nëse prindi e përmend çerdhen me entuziazëm, fëmija krijon lidhje pozitive me vendin.
Shembull praktik:

• “Jam i sigurt që sot do të keni lojëra të reja me edukatoret.”

• “Nuk mund të pres të dëgjoj çfarë do të më tregosh kur të kthehesh.”
  Shmangni fraza që ngjallin keqardhje, si “Më vjen keq që po të lë”.

5. Krijoni një ritual të veçantë ndarjeje

Një “kod personal” për përshëndetje mund të bëhet një përvojë e dashur për fëmijën.
Shembull praktik:

• Përqafim i fortë + një “high-five” me dorë + një pupupu në hundë...

• Një shprehje të veçantë që e thoni gjithmonë, p.sh., “Shihemi pas drekës, kampion/e!”

6. Mos u largoni fshehurazi

Largimi pa u përshëndetur mund të krijojë pasiguri dhe frikë te fëmija. Edhe nëse qan, përshëndetja e hapur i mëson se largimi është i përkohshëm.
Këshillë:
Mbani premtimin, gjithmonë kthehuni në orën që i keni thënë. Ky është themeli i besimit të tij.

7. Bashkëpunoni me edukatorët

Një komunikim i shkurtër në mëngjes me edukatoren ndihmon shumë në përshtatjen e fëmijës.
Shembull praktik:

• “Mbrëmë nuk fjeti mirë, mund të jetë pak i ndjeshëm sot.”

• “Është shumë i emocionuar për lojën me top që i treguat dje.”

Ky informacion i vogël i jep edukatores mundësinë ta qetësojë dhe ta orientojë më lehtë fëmijën.

8. Jepini një send të vogël sigurie

Një “objekt komforti” mund të jetë një urë lidhjeje mes shtëpisë dhe çerdhes.
Shembull praktik:

• Një shall i butë i prindit

• Një lodër e vogël pelushi

• Një fotografi e vogël në çantë
  Me kohën, fëmija do të ketë gjithnjë e më pak nevojë për të.

Adaptimi i fëmijës në çerdhe është një proces që kërkon durim dhe qëndrueshmëri. Fëmijët janë më të prirur të përshtaten kur mëngjesi është i qetë, i parashikueshëm dhe plot dashuri. Çdo përqafim, çdo fjalë pozitive dhe çdo hap i qëndrueshëm është një investim në mirëqenien emocionale të tij.

Duke i zbatuar këto teknika, jo vetëm që do ta ndihmoni fëmijën të ndihet më i sigurt dhe më i lumtur, por edhe do t’i ofroni edukatores një fillim të mbarë të ditës me një fëmijë të gatshëm për të mësuar, luajtur dhe krijuar kujtime të bukura.